يا عراق-سمير صبيح

يريدونك تضيع وانته نور بليل *** وتموت من العطش يالماي يردونك
ويضيعونك عجيب وانته مثل الريح *** وين بيا مكان إتضيع يلگـونك
مشوك بدرب ما مات جدمك بيه *** وحتى إتضيع كلش شدو إعيونك
وغشو عينك وإيدك مزنجلة ومجتوف *** تهد هدة أسد لو ناس ينخونك
يل المغفي الجمر منقلة وبيك إتنام *** وهمة رماد موگـد ما يجوونك
إذا ظيمك طلعته وظل وراك إيحوم *** ابد لتخاف منهم ما يظلمونك
عاشرنه التعب والاه والحرمان *** كلها لخاطرك ولخاطر إعيونك
صرنالك جسر للنجم عبرناك *** وصغنه من الحزن ضحكات لعيونك
تعـلگـنه قطع سودة وعليها أرواح *** ما جنة قطع، لا .. كحله لعيونك
يردونك صبخ والملح ياكل بيك *** ويردونك تبور وما يزرعونك
ويردونك تجف والماي يطلب ماي *** ويردونك تنام وما يندهونك
ما يدرون عرگـك بالأرض ميموت *** ترد تحيه وتعيش شما يگـطعونك
ذاك حسين حي وصير انته مثل حسين *** بالشدة الخريطة إتصير ميمونك
يااااا مدري شوصفك شرد اگـولن بيك *** عراق والعمر ما يسوة من دونك
ليلى انته صرت والمثل ما ينقاس *** وشعبك من محبتك صار مجنونك