يا شعبي شجاك منكسه اعلامك ...عباس جيجان

عباس جيجان

يا شعب العراق شبيك
دون الناس سوده مصخمه ايامك
يا شعب شوكت ترتاح من دون الاعوام مكدره اعوامك
يالحزنك حزن عاشور من عاشور تطلع
تلكه بس عاشور كدامك
وكل حربك عرك باعدام
بيك شما رميت يردن اسهامك
ليه تذبح اخيك على يا مال
على الورقة السخيفه تفجر احزامك
ليه تذبح استاذك علمك حرفين
ولك هذا قدوتك ومعلي مقامك
ليه تذبح طبيبك من يرد للسوك
خليه يداوي جرحك لجمته بهامك
لي تذبح التاجر من يرد للبيت
خله يفطرك يا مدمن صيامك
ليه يتمت الاطفال وانتة ابو الايتام
ما تكسر الخاطر دمعة ايامك
ليه تفجر زوار الحسين لكربلا يمشون
مو هذول اهلك وارحم رحامك
ولك ليش تزعل اذا واحد كلك انا احب حسين
ولك هذا وديعة فاطمه يالتفهم اسلامك
ليه تذبح الشيعي الحب علي الكرار
مو كبل ميكون امام المرتضى امامك
وليه تذبح السني وتحسبه من صدام
مو صدام كان وكان صدامك
وليه تفجر مسجد كنيسه حسينيه انبنت لله
وعلى كل المناير صعدت الغامك
ليه والف ليه
وعجزيت الــ ليه
يا شعبي شجاك منكسه اعلامك
انا ادري بيك عليك اختلفت الرايات
وبس رايات محمد شال صمصامك
تاريخك كبل ما يولد التاريخ
ادم من نزل خطار بخيامك
ونبي ابراهيم هذا السومري من اور
خاف يزايدك واحد على الهامك
و ليه والف ليه
وعجزيت الــ ليه
يا شعبي شجاك منكسه اعلامك

عاشت ايدك ابو مصطفى على الشعر الجميل
تقبل مروري

عاشت ايدك يامبدع

قصيدة قمة الروعه والله هيجت المشاعر يا ابو مصطفى فعلا ليش منكسة اعلامنه ليش دائما مختلفين ليش الطائفية الي زرعة الاستعمار بيناتنه واحنه كلنه اخوة ماكو فرق بناتنه وكلنه مسلمين لا فرق بين سني ولا شيعي ولا مسيحي ولا صابئي كلنه عراقيين كلنه اخوة المفروض احنه نداوي جروحنه ونقف متوحدين بوجة المحتل بس مع الاسف على الدنيا بس نبقه عراقيين ونبقه اهل الغيرة والشهامه وابسط دليل الي صار بملعب الشعب وهذا يدل على ان كل ماجرى بالعراق هو مو بأيدي عرايقه لالالا بأيدي الاستعمار اللعين

باااااااااارك الله بيك على القصيدة الرااااائعه
وانشاء الله النصر لنا وانشاء الله الفرج القريب العاجل لوطنه الحبيب